कमल रंगा, बीकानेर
धरती धोरां री !
आ तो अबै घणी सरमावै
इण पर लोग चरण नैं आवै
इण रौ रूं-रूं पीड़ा पावै
धरती धोरां री !
इण री ओळख है धुंधळावै
नुगरा-नकटा नीं सरमावै
इयां नैं अळावा-टळावां आवै
धरती धोरां री !
भासा-संस्कृति नैं अे गावै
इण री काया नैं कळपावै
खुद नैं फरज याद नीं आवै
धरती धोरां री !
भासा बिन टाबर्यां कुरळावै
बांठका-कैर फोग चिरळावै
मीठा मोर उदास लखावै
धरती धोरां री !
मायड़ हैला-हेल मचावै
आब-ओळख नै कुण बचावै
करौ अैड़ी, मिजळा अरड़ावै
धरती धोरां री !
फतेह करनै मैदान दिखावै
मायड़ रा पूत-सपूत कवावै
अर पीढियां रौ मान बधावै
धरती धोरां री !
जतन करौ, देव पूठा आ जावै
सवायौ सुरग ’धोरा’ बण जावै
सगळा गीत हरख रा गावै
धरती धोरां री !
